वेव्हेलाइट : ॲल्युमिनियमचे खनिज. स्फटिक समचतुर्भुजी प्रचिनाकार पण विरळाच आढळतात [→ स्फटिकविज्ञान]. हे बहुधा अरीय (त्रिज्यीय) संरचनेच्या तंतुमय गोलसर पुंजांच्या व कधीकधी लेपाच्या वा झुंबराकार रूपांतही आढळते. ⇨पाटन : (११०) व (१०१) चांगले. रंग पांढरा तसेच हिरवट, निळसर, पिवळसर, करडसर वा तपकिरी छटेचाही. चमक काचेसारखी. कठिनता ३.५ – ४.वि. गु. २.३ – २.५ रासायनिक संरचना A13(PO4)2(OH)3.5H2O(सजल ॲल्युमिनियम फॉस्फेट). कधीकधी हायड्रॉक्सिल गटाच्या (OH) जागी फ्ल्युओरीन (F) येते. तापविल्यावर प्रसरण पावून याचे सूक्ष्म कण बनतात व बंद नळीत तापविल्यास पाणी मिळते.
