झेरॉम्‌स्की स्टेफान : (१ नोव्हेंबर १८६४–२० नोव्हेंबर १९२५). पोलिश कादंबरीकार. जन्म स्ट्राच्‌झीन येथे. वॉर्सा येथे पशुविकारविज्ञानाचे शिक्षण घेतले. विद्यार्थिदशेतच रशियन सरकारने त्यास अटक केली. तुरुंगात असताना त्याला क्षयाचा विकार जडला. त्यानंतर पशुविकारविज्ञानाचा अभ्यास सोडून देऊन चरितार्थासाठी शिक्षक व ग्रंथपाल अशा नोकऱ्या केल्या. Ludzie bezdomni (१९००, इं. शी. द होमलेस) ह्या कादंबरीने त्याला प्रथम प्रसिद्धी मिळवून दिली. तथापि Popioly (१९०४, इं. भा. ॲशेस, १९२८) ह्या त्याच्या तीन खंडात्मक कादंबरीने यशस्वी कादंबरीकार म्हणून त्याची प्रतिमा निश्चित केली. Dzieje grzechu (१९०८, इं. शी. स्टोरी ऑफ अ सिन), Wierna rzeka (१९१२, इं. भा. द फेथफुल रिव्हर, १९४३) आणि Przedwiosnie (१९२५, इं. शी. फर्स्ट स्प्रिंग) ह्या त्याच्या अन्य उल्लेखनीय कादंबऱ्या.
झेरॉम्‌स्कीने काही नाटकेही लिहिली. Uciekla mi przepioreczka (१९२४, इं. शी. माय लिट्ल क्वेल हॅज फ्लेड अवे) ही त्याची यशस्वी सुखात्मिका. वॉर्सा येथे तो निधन पावला.