रामलिंगस्वामि, वुलमिरी : (८ ऑगस्ट १९२६ – ). भारतीय वैद्यकीय शास्त्रज्ञ. पोषणासंबंधीच्या विकृतिविज्ञानाविषयी त्यांनी विशेष संशोधन केलेले आहे.
रामलिंगस्वामी यांचा जन्म आंध्र प्रदेशातील श्रीकाकुलम् येथे झाला. त्यांनी भारतात एम्. डी. व नंतर ऑक्सफर्ड विद्यापीठात शिक्षण घेऊन डी. एस्सी. या पदव्या संपादन केल्या. त्यानंतर ते इंडियन कौन्सिल ऑफ मेडिकल रिसर्च या संस्थेच्या तमिळनाडू राज्यातील कुन्नूर येथील पोषण संशोधन प्रयोगशाळेत विकृतिवैज्ञानिक होते (१९४७ – ५४). याच संस्थेचे ते १९५४ – ५७ या काळात साहाय्यक सचिव व उपसंचालक होते. त्यानंतर नवी दिल्ली येथील ऑल इंडिया इन्स्टिट्यूट ऑफ मेडिकल सायन्सेस या संस्थेत विकृतिविज्ञान विभागात प्राध्यापक व प्रमुख (१९५७ – ६९) आणि प्राध्यापक व संचालक (१९६९ – ७९) म्हणून काम केले. १९७९ पासून ते इंडियन कौन्सिल ऑफ मेडिकल रिसर्च या संस्थेचे महासंचालक झाले. यांखेरीज त्यांनी न्यूकॅसल आपॉन टाईन विद्यापीठात जॅकोबसन व्याख्याते (१९७१) झाक पारीझो व्याख्याते, जागतिक आरोग्य संघटना (१९७५) जवाहरलाल नेहरू स्मृती व्याख्याते (१९७५) निवासी-विद्वान, फोगार्टी इंटरनॅशनल सेंटर, नॅशनल इन्स्टिट्यूट ऑफ हेल्थ, बेथेस्डा (अमेरिका) (१९७६) इ. पदांवर काम केले आहे.
रामलिंगस्वामी यांनी प्रथिन-ऊर्जा अपपोषणासंबंधीच्या रोगांच्या विकृतिविज्ञानाविषयी महत्त्वाचे संशोधन केलेले आहे. मानवी अपपोषणाच्या प्रतिबंधाविषयी आणि विकसनशील राष्ट्रांतील वैद्यकीय संशोधनाबाबत त्यांनी पुढाकार घेतलेला आहे. या कार्याकरिता लंडनच्या रॉयल सोसायटीने त्यांची सदस्य म्हणून १९८६ मध्ये निवड केली. याखेरीज त्यांना त्यांच्या कार्याबद्दल भारत सरकारचा पद्मभूषण हा किताब (१९७१), मेडिकल कौन्सिल ऑफ इंडियाचा रौप्य जयंती संशोधन पुरस्कार (१९७४), आंध्र विद्यापीठाची सन्माननीय डी. एस्सी. (१९६७), कॅरोलिन्स्का इन्स्टिट्यूटची सन्माननीय डॉक्टर इन मेडिसीन पदवी (१९७४), जागतिक आरोग्य संघटनेचा लीआँ बर्नार्ड पुरस्कार (१९७६), इंडियन नॅशनल सायन्स ॲकॅडेमीचे जगदीशचंद्र बोस पदक (१९७७), बिर्ला पुरस्कार (१९८०) वगैरे बहुमान मिळालेले आहेत. यांखेरीज इंडियन ॲसोसिएशन फॉर ॲडव्हान्समेंट ऑफ मेडिकल एज्युकेशन या संस्थेचे अध्यक्ष (१९७४ पासून), इंडियन ॲकॅडेमी ऑफ मेडिकल सायन्सचे सदस्य (१९६१), इंडियन नॅशनल सायन्स ॲकॅडेमीचे सदस्य (१९७१, अध्यक्ष १९७९ पासून), रॉयल कॉलेज ऑफ पॅथॉलॉजीस्ट्स (ब्रिटन) व अमेरिकन कॉलेज ऑफ फिजिशियन्स या संस्थांचे सदस्य (१९७०), अमेरिकेच्या नॅशनल ॲकॅडेमी ऑफ सायन्सेसचे परदेशी सदस्य (१९७३) इ. सन्माननीय पदांवर त्यांची निवड झालेली आहे. त्यांचे अनेक संशोधन निबंध, व्याप्तिलेख व ग्रंथ प्रसिद्ध झालेले आहेत.
भदे, व. ग.