ताइशान : चीनच्या शँटुंग द्वीपकल्पातील पवित्र पर्वत. हा ताइआन शहराच्या उत्तरेस व जीनानच्या दक्षिणेस सु. ५१ किमी. असून या पर्वतातील सर्वांत उंच शिखराची उंची फक्त १,५०० मी. आहे. या पर्वतात पुष्कळ गटविभंग आहेत. त्यापैकी बहुतेक पुरागत स्फटिकी खडकांचे व ग्रॅनाइटाचे असून काही प्राचीन चुनखडीचे आहेत. चीनमधील पाच पवित्र पर्वतांपैकी हा एक होय. याच्या माथ्यावर व माथ्याकडे जाणाऱ्या रस्त्यांवर अनेक मंदिरे आहेत. पूर्वीपासून हे यात्रास्थान असून येथे भाविक लोकांची सतत वर्दळ असते. प्राचीन काळी अशी श्रद्धा होती की, हा पर्वत मानवाच्या नियतीचा सूत्रधार आहे. बौद्धधर्मीय व ताओ मताचे लोक ह्या पर्वतास पूज्य मानतात. ताओ मतासंबंधीच्या अनेक आख्यायिका आणि दंतकथा या पर्वताशी निगडित आहेत.
