तिरंदाज मासा (टॉक्झोटीस जॅक्युलेटर).

तिरंदाज मासा : पार्किफॉर्मीस गणाच्या टॉक्झटिडी कुलातील हा मासा आहे. त्याचे शास्त्रीय नाव टॉक्झोटीस जॅक्युलेटर आहे. हा जावा व मलाया द्वीपसमूहातील बेटांवर गोड्या पाण्यात आढळतो. हा देखणा असून याची लांबी २० सेंमी. पर्यंत असते, रंग पिवळा व त्यावर काळे आडवे पट्टे असतात. पाण्याच्या काठच्या झाडाझुडपांच्या पाण्यावर आलेल्या फांद्यांवरील किड्यांवर अचूक नेम धरून हा तोंडातून पाण्याची चिळकांडी जोराने उडवितो व ते खाली पाडून खातो. सु. १·५ मी. अंतरावरील किडादेखील तो अशा तऱ्हेने खाली पाडतो. मुखाच्या टाळ्यावर असलेल्या लांब खाचेवर जीभ दाबून तो पाण्याची ही चिळकांडी उडवितो.

कर्वे, ज. नी.

Close Menu
Skip to content