बोर, लाल : (क. सिमेयरनेल्ली इं. वेस्ट इंडियन चेरी लॅ. मालपीगीया प्युनिसिफोलिया कुल-मालपीगीएसी) हे झुडूप वा लहान वृक्ष मूळचा उष्ण कटिबंधीय अमेरिकेतील व वेस्ट इंडीजमधील असून भारतात पुणे, मद्रास व म्हैसूर येथील बागांत लागवडीत आहे. यांची उंची सु. ८ मी. पर्यंत असते. पाने विविध आकारांची (गोलसर, हृदयाकृती इ.) असून गुलाबी, लहान फुलांचे झुबके जूनमध्ये येतात. अश्मगर्भी (आठळीयुक्त) फळ शेंदरी किंवा लाल, गोलसर, १-१.६ सेंमी. व्यासाचे व एकटे असते किंवा अनेकांचा झुबका असतो. ते जुलै-ऑगस्ट मध्ये पिकते व आंबट-गोड असल्याने विशेषेकरून मुलांना आवडते. त्यांचा मुरंबा किंवा सार करतात. विशेषतः कच्च्या फळात ॲस्कॉर्बिक अम्लाचे प्रमाण बरेच आधिक असते. फळात (८३% खाद्य भागात) जलांश ८३.९%, प्रथिन १.६%, स्निग्ध पदार्थ ०.१%, कार्बोहायड्रेटे १३.७%, धागा १.०%, राख ०.७% असते. शिवाय त्यात कॅल्शियम, लोह, कॅरोटीन, थायामीन, रिबोफ्लाविन, निॲसीन इ. असतात. या वनस्पतीची इतर सामान्य शारीरिक लक्षणे ⇨मालपीगीएसीमध्ये (माधवी कुलात) वर्णिल्याप्रमाणे असतात.
